Ake ubabuke…….nje,
Badwanguze, Bangiphunga,
Baphuma inqina bangayithola imvelaphi yami.
Bagadla bahlehla, baphinde bagadla.
Phela mina akekho owazi umama kumbe ubaba wami
Phela mina akekho owazi imvelaphi yami.
Ngifike kwelengabade ngaqotha imbokodo
Kepha isisekelo sasala.
Ngifike ngathatha umama, ngathatha ubaba
Ngabe sengishiya izintandane zikhala.
Ngafike ngathatha ibhungu, ngathatha itshitshi
Ngabe sengishiya abazali bekhala.
Ngikhumbula lensizwa eyayisidlakela, sesigansonso
Ngayidla yaze yaba ngangothi lokuvungula.
Ngikhumbula lentokazi eyayisho ngezitho sengathi amabhodlela,
Imanzi yoqobo.
Ngayidla yaze yaba njengethole liphuma kunina.
Emuva kwalokho, ukuyolusa amadada.
Phela mina uma sengingenile kuwe
Ngiphundula ubusika bube yihlobo,
Ngiphendule ihlobo libe ubusika.
Ugqagqazela, ugodola
ilanga libe liphume ngisho nasebukweni bezinja
Likhipha inhlanzi emanzini.
Ngikwenza ufise ukuphindela esiswini kunyoko
Odokotela nezinyanga bahlulekile,
Ungqongqoshe kwazwelonke wezempilo wehlulekile,
Ngisho uManombazana Shabalala Msimang.
Phela lowo ngimuzwe ephatha indaba kaGaligi noBetroot njengezidambisi,
Akazi ukuthi labo phela abangane bami.
Ozonginqoba sengim’bonile,
Phela ulona othi: -ZITHIBE-THEMBEKA-
Uphinde usebenzise ijazi lomkhwenyana noma lomakoti
Yebo, ngicacise uma uya ocansini, hhayi noma ikuphi
Khumbula ukuthi impilo emhlabeni yinye.
Phela eyesibili ikagoqanyawo.
(24 May 2008, Saturday)
This poem has not been translated into any other language yet.
I would like to translate this poem
very good piece, thank you.