Missing You Part 2 (Un Deseo A Una Estrella) Poem by Jessie Ilagan

Habang nakatitig sa himpapawid
At sa mga tala ako'y nakamasid
Walang masambit dila'y nauumid
Luhang nangingilid aking pinapahid

Nais kong humiling sa marikit na bituin
Pighati ay alisin sa aking damdamin
Kalabisan man na ito ay hilingin
Sana'y marapatin lumbay ko'y pawiin

Nagtatanong itong aking isip
Ikaw rin ba sa tala'y nakasilip
Dinarama dibdib na tumatahip
At sinasamyo ang hanging umiihip

Lamig nitong gabi kung iyong wawariin
Tumatagos sa nahihirapang damdamin
Pag-ibig ko sa'yo paano mo dadamhin
Gayong ikaw ay malayo sa akin?

Liwanag na mula sa kinang ng tala
Maaaninag umaagos na luha
Parang sa akin tala'y naaawa
Nauunawaan ang aking nadarama

Aking puso ngayon ay nananangis
Pagkat sa'yo ay nasasabik ng labis
Yakap at halik mong langit ang kaparis
Sa tala'y nasambit na iyon ang nais

January 18,2010
Riyadh, K.S.A.