ମୋର୍ ମା ମୋର୍ ମା ଆଏ My Mother Is My Mother Poem by Gajanan Mishra

ତାସନିରେ ଗିଲାସରୁ ଚାହା
ରୁକି ରୁକି ଫୁକିଫୁକି ପିଉଥିଲାବେଲେ
ଏଭେ ଭି ମୋର୍ ମାକେ ଦେଖସିଁ ଯେ
କେଡେ ଖୁସି ଲାଗସି ମତେ।

ବଏଠି ଖୁରିଥି ପଖାଲ ଭାତ୍ ନେସି
ଆରୁ ଗିନାଥି ତୂନ୍।
ସୁଖଲା ଭାତ୍ ହେଇଥିଲେ ନେସି ଥାଲିଥି।

ପୁଜା ପରବ ଦିନେ ପରାତ୍ଥି ଜୁଗାଡସି
ସବୁ ଫଲମୁଲ ଜିଇଁତିଆ।

ଜାଗର ଜାଲସି ରାଏତ୍ ସାରା।
ଧୁପଜାନିଥି ଅଙ୍ଗରା ନେଇକରି
ମଙ୍ଗଲାକେ ଦେସି ଧୁପ୍।

ଛଁଚିଆଥି ଅଢିଆ ଦେସି ।

କରେହିଥି ଭାଜସି କୁଟି ଝୁରି
ଆରୁ ହେତାର୍ ବାସନାଥି
ଚହଲି ଯାଏସି ମନ୍ ।

ମୋର୍ ମା ମୋର୍ ମା ଆଏ।
ସଏଲତା ହେଇକରି ଜଲୁଥିସି
ଆରୁ ଉଜାଲା ଦଉଥିସି ଆମକୁ।

ଆରୁ ଜେତକି ଜେତକି କଥା
ସବୁ କହି ନେଇଁ ପାରବାର ତୁମକୁ।