Myndins (Memories: Scots) Poem by Sheena Blackhall

I mynd on the skyrie Tam Thooms
The forkies that bed in their thrapples
I mynd on the sliddery snails
An the bubbles that grew in the sapples

I mynd on an auld blaik tyke
A Scotty, pechin wi heat
In the sun, wi his mochy guff
An the grun, wi his slivers weet

I mynd on a peony rose
Like a Geisha rowed in silk
An a linn o Lily o Valley
Like spirks o fairies' milk

I mynd on granminnie's lap
The crooshie hyeuk eident there
Her kind een glentin like berries
An a treelip o lang grey hair