Mama ngisenguye owakho
Ngisakhasa ngingena ezintangeni,
Ungithatha ungibeka emathangeni,
Ungithulise ungixhume ebeleni,
Noma ngitetema ungishushuzele ungiqamelise emabeleni,
Noma sengilibele sengihlaselwe ubuthongo ngalala,
Ungithathe ungindlalelele ungilalise,
Ungihayele umlolozelo ngozele ngilale,
Mama wami ngisenguye owakho,
Nalapho sengidlodlobala sengiqala ukuqina,
Nemali yesondlo yaqala yakuqinela,
Wangihlalisa phansi wanginabela ngesimo,
Noma kwakunzima ngavula amehlo ngabona ngaqonda,
Namanje ngithi ungigezile inqondo,
Ngeke ngifane nendodana yolahleko,
Mama wami ngisenguye owakho,
Noma ngibe umthwalo emahlombe,
Ngakusinda nokuhlupheka kukugcwele izandla,
Kepha awuphelanga amandla,
Noma sengihlaselwa ukugula nezifo awuphelanga mdlandla,
Ube isibaya sami wangivikela kokubi,
Noma bezifik' izikhath' ezimbi awungilahlanga,
Namanje ngisaluzwa lolo thando lwakho,
Qhubeka ungayeki mama,
Ngisenguye owakho,
Noma sengiqinile manje,
Ngisabheka emuva ngikhumbule izinsuku zobungane,
Noma sengibuka ngawami amehlo manje,
Kepha ngisawudinga umbono wakho,
Noma sengithanda omunye wobulili obuthize,
Mama ngisaludinga uthando lwakho,
Mama ngisenguye owakho.
UYINDLOVUKAZI
This poem has not been translated into any other language yet.
I would like to translate this poem