Salog Sa Kalibutan Poem by Jake Tadla

Ania’g nag-inusara,
Kauban ang barkada.
Nag-isturyahanay.
Nagkinataw-anay.

Nagalingkod sa salog sa kalibutan.
Bugnaw ang tayhop sa hangin.
Mapanimahuan ang yamog
Sa kangitngit ug kahapsay.

Apan pakyas sa pagtago
Sa nagakum-ot nga mata,
Ang matag ambak sa dughan
Inig ikaw ang mahunahunaan.

Naghinaot kong makalimot
Sa hulagway sa maanyag,
Apan di’ gayud mapapa
Ang inagi-an sa tiil.

Hangtod niining takna-a
Samtang nag-inusara ug kauban ang barkada,
Samtang usa ra ka salog ang atong ginatindugan,
Di’ na gayud magbaha ug yamog.