କୋକୁଆ
ଗଜାନନ ମିଶ୍ର
ପୁଅ ବାଙ୍ଗାଲୋରରେ
ଫୋନରେ କଥାହେଲାବେଳେ
ଛିଙ୍କୁଛି, ଖୁଁ ଖୁଁ କାଶ ବି ଶୁଭୁଛି,
ମା କହୁଛି ଏ ପୁଅ ଶୀଘ୍ର ଯାଇ
ଡାକ୍ତରଙ୍କୁ ଦେଖା, ବ୍ଲଡ ପରୀକ୍ଷା
କରିନିଅ ଭଲକରି। ଆରେ
ସେଇ ତୁମ କର୍ଣାଟକରେ
କିଏ ଗୋଟେ ସତୁରୀ ନା
ଅଶୀ ବର୍ଷରେ ମରିଛି
ଆମ ଦେଶର ପ୍ରଥମ
କରୋନା ମୃତ୍ଯୁ କହୁଛି ଟିଭି
ବାରମ୍ୱାର ଗତକାଲିଠୁ।
ଆରେ, ମଲଟିନେସନାଲ କଂପାନୀସବୁ
ଘରେ ଘରେ କାମ କରିବାକୁ
ଆଦେଶ ହେଲାଣି। ଆଉ ବସରେ
ଭିଡରେ ଯାଆ ନା, ମେସେଜ କରି
କହି ଦେ ଘରେ କାମ କରିବୁ।
ନ ହେଲେ ଛୁଟି ନେଇ ଯା
ମାସେ କି ପନ୍ଦର ଦିନ,
ନ ହେଲେ ପଳେଇ ଆସ ଏଠିକି।
ଆରେ ଏଠି ବି ତ ଗୋଟେ ଦଂପତ୍ତି
ଗତକାଲିଠୁ ଭୀମଭୋଇ ମେଡିକାଲରେ
ଅଛନ୍ତି ସେମାନେ କୁଆଡେ କାନାଡାରୁ
ଫେରିଛନ୍ତି ଆଉ ଅଛନ୍ତି ସନ୍ଦେହଘେରରେ।
ଆମ ଏଠି ସରକାର ସବୁ ବିଦ୍ୟାଳୟକୁ
ଛୁଟି କରିଦେଲେଣି, ବିଧାନସଭା ବି
ବନ୍ଦ। ଆଉ କୌଣସି ଆଲୋଚନା ନାଇଁ।
ଖାଲି କରୋନା କରୋନା, ହାତ ଧୁଅ ବାରମ୍ବାର
ସେନିଟାଇଜର ଲଗାଉଥାଅ, ପାଟିରେ ନାକରେ
ପଟି ବାନ୍ଧି ରହ। କି କୋକୁଆରେ ବାବା!
ବାଙ୍ଗାଲୋର ଯିବି ଭାବୁଥିଲି ହେଲେ ଦେଖ
ଆସନ୍ତାକାଲିଠୁ ପିଲାଙ୍କ ପରୀକ୍ଷା ଚାଲିବ,
ଆଉ କି ଛୁଟି କେଜାଣି!
ସରକାର ଅବଶ୍ୟ ତାଙ୍କ ସୁବିଧା କାମ କରିବେ
ନ ହେଲେ ମିଡିଆ ଅଛି ନା!
ଶଳା, କେନସରରେ, ମଦରେ, ମେଲେରିଆରେ
ଧୂଳିଧୂଆଁରେ, ରାସ୍ତା ଦୁର୍ଘଟଣାରେ କେତେଗୁଣା
ଅଧିକା ମଲେ ବି କିଏ ଗଣୁଛି!
ଯାହା ବି ହେଉ ପୁଅ, ଶରୀର ଆଗ,
ଶରୀର ମାଧ୍ଯମ ଖଳୁ ଧର୍ମ ସାଧନମ୍ ବୁଝିଲୁ!
ଦେଖି ଜଗି ଥିବ,
ବାପା କହୁଛନ୍ତି ଚାକିରୀ ଛାଡ଼ି ପଳେଇଆସିବାକୁ
ମୁଁ ଭାବୁଛି ଆଉ ଦି ଚାରିବର୍ଷ ଯାଉ
ଆମେ ତ ଏଠି ସମ୍ଭାଳିଅଛୁଁ।
ଅସମ୍ଭାଳ ହେଲେ ଆସିବ ତ!
ତପୋବନ, ଟିଟିଲାଗଡ, ବଲାଙ୍ଗୀର
14/03/2020
This poem has not been translated into any other language yet.
I would like to translate this poem