Parlàmaid na h-Alba
Vrocht bi a Barcelona architect
Foun o the Royal Mile…a trystin place
A kirn? A maisterpiece?
The reef's inspired bi hulls o fishin boats
Leafs incorporate Queensberry Hoose
Inbye, hear speeches, argyments an quotes
Here's Kemnay granite, Belfast slab fur claddin
Here's gweed Scots aik, wi Caithness steen fur fleerin
Here's glaiss an Italian merble tae be seen
Saltires in concrete, braw mace frae the queen
Here's rowan, aipple, pear, here's birk an lime
Doon frae St Giles stinch kirk that chimes the time
Here's desks o sycamore, a swatch o green
Here's lavender, rosemary, a granite egg
O a pink fittit goose on lava rock
Giftie frae Iceland, the auld Viking stock
Deep natural springs rise up tae cweel the biggin
An solar panels draw the sun fur heatin
There's concrete bamboo poles ootbye the haas
Tsunami micht hae washed them ower the waas
The wirds aroon are meant tae strikk the harns
Fur wirds are tools bi which a body larns
Bricht is the ring o wirds
Say little, bit say it weel
An aa we ask, oor maisters,
Ploo an honest dreel
This poem has not been translated into any other language yet.
I would like to translate this poem