I) Elipsis
tulo ka luha
nagsunod ug
patak
dayon ni ginhawa una ug lawm.
patak
ginhawa.
ug patak.
ning patik, ningkapyot
sa mga linya sa akong aping.
Ang sumpay ug katapusan
sa atong sugilanon nagbitay sa
pangpang sa kawanangan.
II) Kama
Manguhit sa abaga ang mga
pulong nga nakigtapad sa linya.
Mga pulong nga sa usa ka kidhat
makab-ot, makuhit, malugit
ug matuhog ang linya padung sa langit
gamit ang gamay'ng ikid sa tumoy sa lapis.
III) Piryod
Pulong sa padulong na mabiyuda:
Kining tanan
mahuman ra.
Karong taud taod
hukman na sa langit
kanus-a muabot ang
katapusan sa
taas mong paghigda,
taas nga linya sa dekstros,
taas nga bil sa ospital.
Kining tanan, darling
kun butangan ug tuldok -
zero zero
ang sunod.
This poem has not been translated into any other language yet.
I would like to translate this poem
ayay, kanindot sa tulo ka balak. maayo kaayo!