Umhayele Izinkondlo Ezimnandi Poem by senzokhaya umhayi

Uze umhayel' izinkondl' ezimnandi

Kowethu umhlaba thina simazi njengembongi,
Ubehlala ebhala njalo ehay' inkondlo,
Ubumthola ekhoneni ehleli nephepha nepeni ebheke phansi,
Ebhala inkondlo engaconsi phansi,
Ubengafuni ukukhulunyiswa nokuphazanyiswa laph' eloba,
Ehlezi engamathe nolimi nephepha,
Yena nosiba bekuyizithupha ziy' ogwayini,
Uma engabhali uzomthol' ezivele emahontshini,
Ehaya inkondlo yakhe yothando,
Ekhuluma ngengelosi yothando nobuhle bendalo,
Okanye ekhuluma ngomhlaba nokugcola kwawo,
Ubebhala kamnandi ehaya kamnandi nabantu bemthanda,
Bezithamela izinkondlo zakhe,
Bemlalela laph' ehaya,
Abanye bebekhala laph' ehay' inkondl' ethi sithandwa sami,
Lapha akhona mhlampe namanj' uyahaya,
Mengahayi ngicel' ingelos' yezul' ize imhayel' inkondl' ezimnandi,

Ubethi laph' ezohaya eqale ngomthandazo,
Ethi Nkosi sikhuleka kuwe ngomthandazo,
Siguqe ngamadolo sahlanganis' izandla sabheka phezulu,
'Izinyembezi ziyahlengezela ngenxa yokuhlupheka esikubonayo,
Sindlala lomthandazo phambi kobuso bethu siyizimbongi siwuthumela kuwe,
Nkosi ibanathi kuze kube sekupheleni, '
Egqoki isiphamban' esakhiwe sabazwa ngogodo,
Sabiyelwa ngobuhlalo obumnyama nobunsundu,
Ebhala ngolimi lwesiZulu,
Ezithanda ezamaciko ewahlonipha namasiko abansundu,
Elandlela ophezulu weZulu,
Nabaphansi ubengababukeli phansi,
Ngob' uMdali ubembeka phambil' ehlabela namadlozi,
Ezinkondlweni ngiyamcelela ukuba eyoba idlozi,
Ezulwini ngiyamcelele bawo umenz' ingelosi,
Nkosi ephezulu ngikyakucel' uze umcelele izingelosi,
Kuba zimhayel' inkondl' ezimnandi,

Bengithanda ukumlalela,
Njalo mengimbone endlelen bengimcel' ukuth' engihayel' inkondlo,
Sihlale phansi kwesihlahla ngimunanele,
Lapho eqala eyikha phezulu ehla nayo ngezigaba zamabinza,
Efanisa engathekisa edlalis' izaga nezisho,
Ephicaphic' impilo ngeciko,
Ejula ngothando ethinta emanonini,
Ekhumbuza abafelokazi ngabayeni babo abaswelekile,
Eduduz' abalahlabekile,
Ekhuthaz' abalahl' ithemba,
Ekhale njalo ngokufa nangezifo zomhlaba,
Ehlaba egxeka ehlikiz' ukungahloniphi ngontanga,
Namhlanje izwe ulishiyile,
Izulu limthathile,
Ngiyakucela Nkosi uz' umcelel' bemhayel' inkondl' ezimnandi,

Ngimcelela kuwe Mdali,
Umvulel' amasango ezulu,
Umvumel' ehaye naye uma ecela,
Umuphe usiba nephepha ebhale um' ezokhona,
Laph' akhona ungamuphuc' ikhono lokubhal' inkondlo,
Umkhuthaz' ukuba eqhubek' ehaye,
Sohlala simlalele ngamadleb' enqondo,
Simbona njalo nangamehlo enqondo,
Siyethemb' unawe emadlelwen' aluhlaza,
Ngiyathemba uhlezi eduze kwakh' ezulwini,
Ngiyethemb' izono zakhe uzithethelele,
Uma engakafik' ngisacel' umvulele egedeni,
Umngenis' iZulu,
Umcelele bemhayel' inkondlo ezimnandi,

Bengith' nami ngimbhalelile inkondlo,
Bengifun' ukumhayela eyizwe esasezweni,
Kepha ngithe ngisayiloba ngingakayiqedi yena wasweleka,
Ngagqemek' ingoz' enhlizwiyeni ngingasamhayelanga,
Akasangibonanga ngiqephuza ngimdlalela ngenkotha,
Angisalitholang' ithuba lokumzwis' ikhono angifundise lona,
Angilifumang' ithuba lokumhayel' inkondlo angiphe yona,
Ngiyamaz' uyazithand' inkondlo ezimnandi,
Nginethemb' useyibhalile inkondlo ngobuhle nobukhazikhazi bezulu,
Nakuye ngiyamucela ukuba efike ezongihayela yona ngephupho,
Bese kuthi kuwe ngelosi eyimbongi phezulu eZulwini,
Ngikucela uze umhayel' inkondl' ezimnandi,

USenzokhaya Umhayi.