Us Munafiq Mein Wafa Karne Ka Yaara Kab Tha Poem by Rekhta Pataulvi

Us Munafiq Mein Wafa Karne Ka Yaara Kab Tha
Hum Jise Apna Samajhte The Hamara Kab Tha

Uske Humsaye Bacha Paye Naa Shabkhoon Se Use
Ab Ye Kahte Hain Hamein Usne Pukara Kab Tha

Aaj Bhi Aankhon Mein Firta Hai Wo Dilkash Manzar
Us Pari Chehra Ne Zulfon Ko Sanwara Kab Tha

Umrbhar Humne Kia Tapte Bayaban Ka Safar
Kisi Gesu Kisi Aanchal Ka Sahara Kab Tha

Naaw Girdab Mein Fansni Hi Thi Mallah-e-Qaum
Paas Bahar-e-Siyasat Ka Kinara Kab Tha

Aye Khuda Dekh Mujhe Dete Hain Taana Aghyaar
Rekhta Tera Balandi Pe Sitara Kab Tha.