Ye're A Lang Time Deid (Scots) Poem by Sheena Blackhall

Ye've niver swam the Barrier Reef?
Takk a plane an breenge aheid!
Dinna lat a meenit waste
Remember, ye're a lang time deid

Ye'd like tae bungee lowp in France?
Grip the meenit ticht indeed!
Takk the ferry ower the waves
Remember, ye're a lang time deid

Ye fancy somebody frae afar?
Grab the thrissle bi the heid!
Tell them straicht, ye've nocht tae loss
Remember, ye're a lang time deid

Ye'd like tae sclimm Mount Everest?
Crack on, brither withoot dreid!
Tho ye skyte doon on yer dowp
Remember, ye're a lang time deid

Larn Swahili, fencin, chess
Live, afore ye rin tae seed!
There's nae study in the mools
Remember, ye're a lang time deid

Wheesht…is thon the doctor spikkin?
Cock yer lugs. Ye maun takk heed
Aathin's best in moderation
Remember, ye're a lang time deid

Atheist? Agnostic? Theist?
Explore ilkie different creed
Fin the ane that suits yersel
Remember, ye're a lang time deid

Dinna claik ill aboot ithers
Gossip spukken's quick tae spreid
Seelence is the kindest wye
Remember, ye're a lang time deid

Gie yersel the gift o quaet
Life is mair than cheese an breid
Try a whylie still an calm
Remember, ye're a lang time deid

Spent a lifetime gaitherin gear?
Luv is better far than greed
There's nae pooches in a shroud
Remember, ye're a lang time deid

Fowk makk judgements on yer spikk?
Be prood o the guid Scots leid!
Sune yer tongue'll stop its claik
Remember, ye're a lang time deid

Like the girse oor time is shortsome
Rose, an queen, dictator, weed
Fame's a leaf that dwines an faas
Remember, ye're a lang time deid