Moses Mtileni

Rookie (18/06/1983 / Giyani, Limpopo)

Ncino Wa Mathumbhani - Poem by Moses Mtileni

Loko timbila ta dyondzo-xidzi ta ha swekiwa
U hlawurile ncino wa mathumbhani emagondweni ya Hillbrow
Magondzo la' ya xurheke ngati ya swihovori swa lunya
Ni mimoya ya timbulwa ntsena ti nga dlawela murhu
U ku xilotlelo xa nhluvuko a xi fihliwanga embilwini ya buku
Hambi marhobyati i xifaniso xa vuswa ni ntokoto wa vusweki
Lomu tihodela ta miako ya swimbindimbindi leswi hlekuriweke hi masungulo
Miako yo navela ku khinsama hi matsolo yi phokotela swendlo swa vaaki
I vangani va nga nwa exihlobyeni xa mbilu ya wena
Swona yona ya ha ba exifuveni loko ri tlhava
Mpfhuka kaya ku nga laha ri tlomutaka kona
Ku hlambiwa hi Savanna na Smirnoff, comela ra mavito yo duma
Vana u nga tswala swi dya etaleni ku kota tinguluve
Swona wa ha swi tsundzuka ni mavito
A ha ha vuli swivongo swa vatata wa swona
U bindzurisa mirhi u tshika titalenta ti kurha
Swi to swi yini Masaswivona ntombhi ya Mkhayisi
Siku mirhi wu nga ta karhala marhambu ya ku tshika
Ivi vaxavi va languta etlhelo va nyenya ku kutsa va londzota
Lemana na Xingwedzi swi ta va swi khukhuriwile
Swibedlhele swi ta pfumala ko hefemula hi ntungu wa cholera
U ta pfumala vundhawu exigurumbanini xa kokwana Nkiyasi
Xi ta va xi mitiwile hi magandlati ya nkhuluko wa Ritavi
Swona ndlela ya Xipilongo wa ha ta yi tiva
U ta vutisa mani na Xitsonga xi nga cela nkele xi nghena
Hambi nxavo wa nsuku wa enhla emakete n'wana Mkhayisi


Comments about Ncino Wa Mathumbhani by Moses Mtileni

There is no comment submitted by members..



Read this poem in other languages

This poem has not been translated into any other language yet.

I would like to translate this poem »

word flags

What do you think this poem is about?



Poem Submitted: Saturday, December 11, 2010



[Hata Bildir]