मिथिंगा Poem by Bidindra Basumatary

नै! मिथिंगा,
नोंनि समायना-रमायना महराव
आं जावलिया जाबाय;
बिफां-लाइफां सारि सारि
दैमा-दैसा जिरि जिरि
हाजो-हाला लारि-लारि।
राज्यो जायो नोंनि बिखायाव
दाउसिन-दाउला मि-जुनार
अराय रंजा खुसि गोजोन!
गोसोआव गियो आरो सानो आं
जेब्ला आं खोनायो,
अरण बारियाव सिलाइनि सोदोब;
बिखा फोरदान फोरदान
बर' बिमानि फिसाफोर ओंखारबोदोंसै
नोंनि बे बिखानि गेजेरजों
हारिखौ फोथांनो थाखाय।
आंनि गोसोआ मानिया
मानिबा खुसि दं
बे मुलुगआव अराय;
आंनि मेगनाव रिफियो
खौसे गैयै आरो दुखु-दाहा।
नै! मिथिंगा,
जोंखौबो फोरोंदो नों
नोंनि बिखायाव गोरोबनानै थानो
खौसेथिनि लोखौ बोजबनानै लानो
हारि आरो हादरखौ सिबिनो
अराय मुलुगाव गोजोन्थि गायसंनो।।