नोंनिसिम सौहैयै लाइजाम Poem by Bidindra Basumatary

लांथिया खाखोराव एरदोंमोन
रेबगननि खर'खौ गोजों खालामना
मुहिनायनि देंखो आगरजों
नोंनो गथाइहरनो हाबिला लाना
निजोम हरनि समनि खारथाइजों
गोदै एबा गोखा सुवादनि जथाइ।
मिथिस' मोनै
गोर्बोआव मोदै बोहैयो
खाबुनि हाब्लां आरो नायब्लां नुहुरियाव
फे-फे-फु-फे गाबो हाबिलायाबो
फांथेनाय नायब्लां आरो हाब्लांनि नोजोराव।
-
थिनानै दोनो जोथोनै
लामा नायो गोसो हमथाना
खाबुनि हाब्लां आरो नायब्लां सेराव
खेवब्लागोननि मिजिं लाना
नोंनोनो सावसुबहोनो सानना
आंनि सुवाद गोनां-गैयै रेबनाय।
-
लाजिनाय आरो गिनाया बाहा बोयो
आंनिनो सोलेर सायाव
सिखिरि मानसिफोरनि नोजोरथियाव
फोथाइनो हायि गोर्बो खनासेया
समाव फोथाइयो, समाव एसेबो फोथाइनो हाया जायो
जायनि थाखायनो नोजोर आंनि
गोरोबहैया नोंनि नोजोरजों
गोग्लैसोयो गाहाइयाव आरो बबेथिंजायबा।
-