लाइमोन समनि सम Poem by Bidindra Basumatary

गोसोनि बिलिरनायजों लाइमोन गोसोआबो
हायाखै आंनि जुथेयै दायो
सम आरो बोथोरनि गेलेनायजों आंबो
गुमुर मोनस'यै मुहिनायनि बेंखन दबायाव
बेनि गेवब्रुगोननि सिमा गैया।
बारनि रंजालु बिलिरनायजों रंजानाय सोलेर
थाइनै मेगननि नोजोरथि अरायजोर
बिरलाङो अनजालिनि दखना महराव
बिलिरलांनाय दैसा सेरनि सुदेम बारजों
बिरफानाय खानाय बिलाय मोसानाया
समाइयो आंनिनो गांनाय बिखायाव।
बोदोर जानाय गोसोआ
गेवलांफुनाय गलाब बिबार बादि महराव
सान हर दायो आं गोमोहाबो।
खौरांनि सेर सेर आं खारफायो
जेराव नोंबो।
जुजिनायनि अनगा जेबो गैयाब्ला
जाफुंनायनि फैमाल मिजिंआ
जिउ संसाराव बाहा लाखागोनखा
साननाय आरो बुंनाय जिउआव।