अन्थाइनि दुथां Poem by Bidindra Basumatary

अन्थाइ-राजखान्थिगिरि
बिबार-फोरोंगिरि
बनजार-बिग्रायारि
सिखिरि-लिरगिरि
मोस्रोम-खौसेथि।
अखा-आबादारि।
खाखोर-फोरजा, राज्यो।
जोमै-रांखाउरि
एम्बु-हेफाजाबगिरि
थिलि-नख'र
रानस्राव-खरान-निखाउरि।
माख्रा-सुथुर गोसोनि।
__________________
अन्थाइफोरनि गोजा मेगना
दाबो सोलायरोङा
खाखोरफोरनि लांथिया
सामायरोङि उखैनाय गोर्बोखौ
गोरा दाथाइजों जिग' जिग' नाख्रेबदों
जिग' जिग' थगायना हुमखिना
गावनि हाद्रि-हाब्रुखौ हुगारबायहोदों।
बिबारफोराबोसो दिनै
गावसोरनि मोदोमनायनि सोलाय
खायफाया मोनामदोंसो
अन्थाइनि मोदोम बिलिरनायजों।
अन्थाइफोरनि गोजा गुफुर बासिलायना
जुदा थं आरो मुं होना
दाबफा दाबफा फारि आवग्रिना
मोस्रोमनि महर खोमादों
अनथाव मोस्रोमा
बाखोनायथाव मोस्रोमा
दिनैबो उजिनो हालिया
बिसोरनि गावजों गाव हुफ्लेदलारनायाव
सिबाय थैनाङो बाब्रामनोबो सम मोनै
गेब्लेलाङो सह' नुस'यै।
अखानि एम्बुआबो दिनै
गाबखेनेनो समखिखांबाय
फारसेथिं जोमैनि आंखाल
रानस्राव खरान थिलिया।
सिखिरिफोरनि बिरबायनायाबो
माब्लाबा गां गेवस्रा रोंलिया
माब्लाबा बिदै सोबनायनि दाय
माब्लाबा थांखिना खिलानो हाया
अन्थाइफोरनि बिदैखौ साखिना
थावनाय थावैनि सुवाद सावरायब्ला
माब्लाबा बिबारफोरनि गोदै गोखा
सोबथिंना सोंथिलाब्ला
बनजारनि अरा गुदुंना गुसु
बेफोरखौ सुलाद लायोब्ला सिखिरिया
माब्लाबा बागानावनो बिरबायनो हाया जायो
सोरिगिदिं माख्राया जे बानायो।