नंखाय जिनाहारि Poem by Bidindra Basumatary

सिरिमोनखांनाय गोर्बोनि मिजिंखौ
नायगार नायगार मुगैथावै दिनै-
जिनाहारि खालामनो नाजाथाबदों
सानैसो फान्दायसुलाफोरनि फावथिनायाव।
-
जोमैनि सिमांआबो बिरदावदों
सोरबानिया दिनै उदाङै
गावनि थि थावनि खोमाना
जेराव जोमैजों जोमैनि दावहा।
-
दावहानि खारथाइयाव अखा खोरोमदों
मिजिं सिमांआबो उन्दुस्रिना थायाखै
सानैसोनि ओलैस्रो उन्दुस्रिनायाबो
हायाखै गासैखौबो फासि होना बुथारनो।
-
दखना दबायाव दैस्लुं सिरिलांबाय
अखा दामब्रानि सिमब्रे लांनायाव
दायो नुस'नै नङा नुस'नदोंआनो
सानैसोआसो मानोबा नायनो बाखांदों ।
-
बेसेदि मिजिं लाना सिखारदोंमोन
हर स'सेयावनो खोमसि फुंबिलियाव
दायोलाय मानोथो सान ओंखारनोसै समावसो
हाया हाया जुनार आखुनि जिनाहारि!
-
नोंसोरनि खालाय सोलेरनि गोर्बोआ
गासै अख्रांनि जोमैखौनो खालाय खालामनो हाया
आरो गासैबो जिनाहारिनि फाख'नाव खालाय जायाखै
दिनै निस्थुरनि एमब्रानाय नोंसोरनि जिनाहारियाव।
-
गोग्गानाय मोन्दों जानांगौ नोंसोर दायो
गोर्बोनि मिजिंफोरखौ जिनाहारि खालामना
सान स'सेयावनो मोखां दोनखुमाहोनो नाजानायाव
नाथायदि बेफोर गासैबो जुजिनायनिसो खाबु।
-
नोंसोरनि जिनाहारियावनो जोमैनि गोबार खारथि
आरो नोंसोरनि फासिनि सुलुंआवनो जोमैनि रोदा
जाय रोदायनो लाबोगोन दै सोबखांना
आरो बेनो लाबोगोन उदांनि अखा।
-
बै अखायानो फिसिगोन गाबख्रावनाय जोलै बेगर
समायहोगोन रानखांनाय फसल आबाद थिलि
सोमखोर समायना बिबार गेवलां-गेवथां गेवलांगोन
रिदि-रिदां फिथाइ थाइख्रिगोन।
-
अब्लाना नोंसोरनि खालाय गोर्बोआ लाजिमोनगोन
जेराव नोंसोरनि सोमखे मोखांआ लाजिरोंनाय नङा
थारैनो नोंसोर लाजिरोङा
गावसोरनि खाबुवाव जिनाहारिनि बोलो।