आघोननि सिमां Poem by Bidindra Basumatary

आघोननि दुब्लिखौनो उखैगाहोनो
गोलोमदै फसर फसर मावदोंमोन
ज' ज' सावरि-बादालि जालायना
बेसेबा खौसेयै मिजिं रनसाइना;
जोलै मोजां बासिना फोदों खोथिया,
खोथियानि महर, जेब्ला सोमखोर समाइदों
आइजोफोरनि दुंलोब आखाइ हुब्लिदनायजों
आबादारि हालुवाफोरनि फाफ्लिया बाथियै बाथि
आघोननि दुब्लिखौनो उखैगाहोनो।
जेब्ला आसार सावोन फादोरनि दुब्लिया
दैनि थिम अनसाइनायजों सोमखोर;
दायोलाय आरो मानोथो हेंथा?
गावजों-गावसोलाय मानिथो दावहा!
जेराव मोनगोनखौनो मिजिंथिना
खालामदों खौसेयै माइ आबाद।
दायोसोलाय मानोथो सम ससेया
जाया, फिथाइ थाइनाय नङा बुंसावखो?
माखौ नायना, माखौ नुना बुंखो?
बबे बिगियाननि दाजेमजों आनजाद नायखो,
सोर अजानि दर्खंआव नायखांहैखो?
बेयोथ' गबदा अजा एबा सोरबा अजानि नङालायो।
बेयाव मोनिनि रावानो थाथावा।
एम्फौ जादों, थारैनो नंगौ,
रासाइनि हासार मुलि बाहाइगोन
अस्टार, ट्रेसेल, बायदि मुलिया बहाथो गोमालायदों?
बिखुंआव मेसिन स्प्रे बाना
मेगनाव ससमा, खुगायाव मुखा
सारफावगोन बिष-
जाय फोजोबस्रांगोन मिजिंनि सुथुर।
जेराव आघोननि दुब्लिया उखैगागोन
आरो जोंनि मिजिंआ जाफुंसारगोन।
जों बयबो सहायलु आबादारि
आघोननि दुब्लि उखैगाहोनो।