सानबोलाउरिनि रेगा-15 Poem by Bidindra Basumatary

दावहा बेयो दावहा
हारिजों हारिनि दावहा
दावहा! दावहा! ! दावहा! ! !
बर'नि बाख्रियाव अर जोंब्लावदों
अरखाम अरखाम मोनामदों
जोसा माइब्रा माइनि खामनाय
गन्थंआव हबाहब हाबदों
गोर्बो बिखा खामखांदों
हावरिया बर' हारिया।
-
दावहा! हारियारि दावहा
2012 मायथाइ
आबाद फोथारा सोन थाहां थाहां
हाल एवनाय माइ गायनाय
गिलुं-गिलुं हां मेंग्लिनाय
सान हाबस्लाबनो मोनै ओंखाम जाखाबायनाय
बयनिबो खुगानिफ्राय राव ओंखारनाय
बोथोरा मोजां नङा साग्रिद जा।
-
थासारिया दुंहावथारदोंमोन अब्ला
प्रि कसिंनि क्लासाव ओंखारलांदों
मेट्रिक आनजादनि हाबलां मोखांआव
दायो गिलुंयैनो जों थांदों
फरायसालि लांगोना रावबो गैया
जोंनि थाखाय गिथावना
गाहाइ फोरोंगिरि दासा
जेबोआनो गैया थासारिनि खारथिजों
लेङाइ फोरोंगिरिया रागा जोंखांदों
दुंहाव थासारियावबो फरायसालि दोनथ'नायखौ।
-
गामि गामि उन्दै गेदेर गासै
आखाइयाव फिसा फिसा आगजु
थारैनो हागोन बेजों जुजिनो!
बिसोरनि अखा खोरोमदहोग्राजों!
-
पुलिस मेलिटारि ओनसोलाव
जायखौनो मोन्दों बुख्रुब सुख्रुब बर'खौ
मोजां मोजां बर' सुबुं अबथिरा बिदाय
मोदैया बिमानि थाबथारोंआखै।
-
थासारियाव बांसिनाव बांसिनदों
नांला बंसाफोरनि थि गैयै रावफोराव
जाय जेरै सोंहरलायदों जानबुंजों
फारसेथिं थासारिया दुंहावसिनदों।
-
रिलिफाव थाहैदों लेथेर फेथेर
गावनि हायावनो जों रसा नांनांदों
जानजियाव दखना गानग्राफोर
लोब लोब बर'नि सायाव उरख्रांफैदों।
-
राजखान्थिनि बिथायाव खर' गिदिरफोरा
गैया एसेबो अननायनि बिखा
थासारिनि जेबो बिजिरथि गैया
दायनिगिरि गासैनिबो जों बर'हा
नाथाय गुदिया?
बेफोरनि गुदि बिजिर बिजिर
नायसोमनायनि जेबो मावथाय गैया
बर'निल' हेंथा गासै बुब्लिया।