7 Scots Callander Haiku Poem by Sheena Blackhall

1.Dour blaik-faced yowie
Sclimmin Ben Vorlich's corries
Cannie an tentie

2.Aside Rob Roy's Cave
I skytit on glaury dubs
A stoonin dooncam

3.Amang Loch Voil's seggs
Winter skreichs like a banshee
Teirin her claes aff

4.An erne birls ben the lift.
Neth Kilmahog's bricht saplins
A bawd sits chitterin

5.Reeshlin, splootrin waves
The River Teith rins bauldly
Boskie, ower the steens

6.Tuck-tuck-kecklin hens
Scrattin ahin the buikshop
Layin eggs for bards

7.A lintie wheeples
Brichtenin Balquhidder's crannies
Flaffin ben the road