Ghazal - Saikadon Zahr-E-Gham Apni Dunya Me Hain Tishnagi Jab Sataegi Pi Lenge Ham. Poem by Dr. Alim Usmani

Saikadon zahr-e-gham apni dunya me hain tishnagi jab sataegi pi lenge ham.
Tum hamari taraf se paresha'n na ho hamne tae kar liya hai ki ji lenge ham.

Jo gham-e-zindagi se hain sahme hue qabil-e-maut hain tu unhen maut de.
Ham mujahid hain ye tujhko maaloom hai la idhar zindigi zindigi lenge ham.

Dil ki veeran basti basegi na ab shama koi yahan par jalegi na ab.
Jake jalwafaroshon se kah de koi laut jaen nahin raushni lenge ham.

Waqt kam hai agar tum nahi aaoge ham kahe de rahe hain ki pachhtaoge.
Tum pukaroge ro ro ke hamko magar phir na bolenge honton ko si lenge ham.

Bam pe aake khud ko na ruswa karen un se kahdo ALEEM ab wo parda karen.
Zindigi ka andhera mitega kahan do ghadi unko gar dekh bhi lenge ham.