Ina (Tagalog Poem) Poem by Catherine Agunat

Hindi ka man isang pintor
Ng mga obra sa Roma
Pagmamahal mong wagas
Sa tahana'y ipinamalas

Sa kabila ng katalinuhan
Ang maging manunulat o makata
Ay hindi mo inasam
Manapa'y sa pamilya ipinaubaya

Ika'y dakila't uliran
Wala mang kakayanan sa pag-ukit ng bato
O paglilok ng tao
Daig mo pa ang iskultor

Sa paghubog sa aking katauhan.
At paggalang sa simbahan
Hindi ka nagkunwang santo o diyos-diyosang
Madaling gampanan

Ang iyong kabanalan
Ay pusong si Kristo
Ang nananahan
Biyaya sa aking mundo

Hindi ko kailangan sina Raphael
At Michaelangelo
Ikaw lang ang Madonna
Ng buhay ko

Ina.