ସକାଳର ସୂର୍ଯ୍ୟmorning Sun Poem by Gajanan Mishra

ତୁମ ପାଟିରୁ ବାହାରୁଥିବା
ଗୋଟି ଗୋଟି ଶବ୍ଦ
ଦେଉଛି କହି
କଣ ସବୁ ଅଛି ତୁମ ଭିତରେ
ଆଉ ଚାଲିଛି କଣ କେତେବେଳେ
ଆଉ ତୁମେ ପାଉଛ କେତେ କଷ୍ଟ।

ଅପେକ୍ଷା କର,
ଆଉ ରଖିଥାଅ ଯାହା ଅଛି ଯେମିତି
ତୁମ ଭିତରେ ରହସ୍ୟ।
ଅବଶ୍ୟ ପାରିବ ଯେତେବେଳେ ବୁଝି
ତୁମଠି ତୁମେ ଆଉ ନ ଥିବ।

ତୁମକୁ ଜଣା କଣ?
ନିଜଠି ନିଜେ ତୁମେ
ହୋଇଛ କି କେବେ ଅବତ୍ତୀର୍ଣ୍ଣ!

ତୁମେ କଣ ଶୁଦ୍ଧପୂତ?
ତୁମେ କଣ ନିର୍ଭୟ?
ନିଜକୁ ନିଜେ ପଚାର
କିଛି କଣ କହିବା ପୂର୍ବରୁ।

ଘଟୁଛି, ଘଟିଯାଉଛି ଯାହାସବୁ,
ସେଥିରେ ହାତ ନାହିଁ,
ନା ତୁମର, ନା ମୋର!
କାହାକୁ କଣ କହି
ବଦଲା ନେବାର ବି
ନାହିଁ ଅଧିକାର।

ସତ କିନ୍ତୁ ଏଇଟା
ଆମେ ଆମକୁ ସୁଧାରି ନେଇ
ଅପେକ୍ଷାରେ ଥିବା ଦେଖିବାକୁ
କେମିତି ଆସୁଛି ଉଠି
ସମସ୍ତ ଆଲୁଅ ଧରି
ଆଗାମୀ ସକାଳର ସୂର୍ଯ୍ୟ।