अपारेस्वन अल आवत(Operation All Out) Poem by Bidindra Basumatary

बर'नि बिग्रायारिखौ नागिरनो
हरनाय सान्थ्रि हान्जा
बर' ओनसोलाव हाबग्लुंदों
बर' फिसाफोरानो गिलुं-गिलुं
जानाय लोंनाय खहाबा
मावनो दांनो गोसो जवा।
दाय गैयैखौबो बुख्रुब सुख्रुब खालामदों
गावथारदों बुथारदों खास्रि-बिस्रि
जिनाहारि खालामदों
माखासे बर' आइजोफोरखौ।
बर'नि सायाव उदखारसो खालामदों
अपारेस्वननि मुङाव गामि गामि हाबना।
आंनि ओनसोलावनो
नै खास्रि बिस्रि बुथारबाय
आंनि खोमायावनो रिंसारबाय
नंखाय दाय गैयैखौनो जिउ फोजोबबाय।
निउस मेडियाफोराबो फोसावबाय
नंखाय बांसावबाय
बर'नि सायाव गासैबो गाग्लोबबाय।
गोर्बोआव थानाय आइजोखौबो जिनाहारि खालामबाय।
गासैखौबो अग्रुपनति साजायबाय
बिग्रायारिनि हेंथा दैथाइनाय
भारत सान्थ्री हानजा।
बर'हाल' बिदि जाबाय
आनै गालियाबो मोदै हुगारबाय
आबै गाब्रुआबो होसो लांबाय
गोबाख्रब गोबाख्रब होसिख्रावना गाबबाय।
बे हारियालाय मानोथो
एसेबां आलाय सिलाय
गुबुन हारिजों मोहेजानाय।
दुखुआनोसै बर'नि बिलोगो,
असे बिसुगे दासानदै बर'नि।।