Sara Teasdale 53 - രത്നങ്ങൾ Poem by Unnikrishnan Sivasankara Menon

രത്നങ്ങൾ

This is Malayalam translation of the poem 'Jewels' by Sara Teasdale.

നിന്റെ മിഴികളിൽ ഒരിക്കൽക്കൂടി നോക്കിയാൽ
അവയുടെ നോട്ടം എത്രദൂരം പോകുമെന്ന് എനിക്കറിയാം-
തിരികെ, മഞ്ഞിൻ മീതെ ഇന്ദ്രനീലനിഴലുകൾ
വീണ ഉദ്യാനത്തിലെ ഒരു പ്രഭാതത്തിലേക്ക്.

അല്ലെങ്കിൽ തിരികെ, വസന്തത്തിൽ ഓക്കുമരങ്ങളിലേക്ക്,
പച്ചിലത്തണൽതൻ വൈഡൂര്യത്തിലെൻ മുടിച്ചുരു-
ളഴിച്ചുകൊണ്ട്, നിൻകാൽമുട്ടുകളിൽ വിശ്രമിക്കു-
മെൻ ശിരസ്സിൽ നിൻ പ്രേമചുംബനമേകിയപ്പോൾ.

തിളങ്ങുമൊരിടംകൂടി നമുക്കോർമ്മിക്കാം-
എങ്ങിനെയാണോ ഇളംവെയിലിൽ ധവള-
മയമായ ഒരു വജ്രവിഭാതത്തിൽ നരച്ച കാടൻമല
അതിൻ ശിഖരത്തിൽ നമ്മെ പിടിച്ചുവെച്ചത്.

പക്ഷേ, ഞാനെൻമിഴികൾ നിന്നിൽ നിന്ന് തിരിക്കുകയാണ്,
പകലിൻ സുബോധത്തിൽ അണിയാൻ വയ്യാത്ത രത്നങ്ങൾ
രാത്രിയിൽ അണിഞ്ഞശേഷം അഴിച്ചുവയ്ക്കാൻ വേണ്ടി
പെണ്ണുങ്ങൾ തിരിയും പോലെ.