Sikhirini Nwzwr Poem by Bidindra Basumatary

सिखिरि नों! सिखिरि,
मानो बिबार बिबार बिरथिंदों,
मानो?
मोदोफ्रुनाय समायना गोदै बिदै
नोजोराव बारनैबो बिबार।
बेयाव सोबलाय बैयाव सोबलाय
अहाया अहाया सोबबायनाय
बेरे-बामब्लेमाफोरा बेसेदि मिनिलांदों
बेसेदि रायखुमालायदों
नोंखौनो सावरायसावदों
नों मिथियाखै; नों मिथिनोबो नाजाया।
आंजों रायदावनाय नों मानो सिरि
आंजों खौरां सावरायग्रा मानो निजोम
फोथाइदोंमोन आं आरो जों नोंखौनो
समायना गोसोनि लोगोरि
आं नोंखौनो आंगोथि सानोमोन।
नोंनि नेहाद हाबाया
नोंनि सानस' हायै गोसोआ
मा साननानै, मा नुनानै?
बारनै बिबाराव खेबसेयैनो बानो नाजाखो
जेराव बागानसेनि नङा बिबार।
नों मानो गोजान गोजान, आंनि
मानो हारसिं हारसिं!
बेसेदि फोथाइथावमोन नों बागाननि नोजोराव
अनथाव गोर्लै लेफे-लेफे सोलेरा।
नोंनि खुगानि सुवादखौ बिबारफोरा मिथियाखैमोन
नोंदि गुबुन बागानावबो गुबुन बिबारनि
गोदै बिदै सोबना फैदों।
एसेबो उदिस लायामोन जानांगौ बिबारफोर
नोंखौनो गोर्बोजों फोथाइसारना।
दिनै नों गावनो गाव हमस'हाबायब्ला
बे गोरोन्थिया नोंखौ फोरोंबाय
सांग्रां आरो आखु दानो।
नों आरो बेबादि दा मावबावसै
जेराव फलानाबो गंसे थिरजों हायाखै
हाग्रानि मै मानै; मासेनि अनगा।
आंथ' सानाखैमोन आरो गुबुनाबो
दिनै गोमोहाबसावदों जों बयबो।