The Chat Show Host Spikks Tae The Proverbial Corbie Poem by Sheena Blackhall

Foo are ye sae partial tae ettin een?
Tykes bark as they are bred

Are ye nae sorry tae slay a lammie?
Daith speirs nae awkward questions

Yer aye the first tae feed aff ony roadkill
Theres naethin got frae delay
Bit dirt an lang nails

Ye've nae close friens I jelouse
Friens are like fiddle strings
They maunna be screwed ower ticht

Yer voice is verra roch
Gin ye've gall in yer mou
Ye canna spit hinney

Dis etten orrals an intimmers nae scunner ye?
The proudest nettle growes on a midden heid

Thank ye maister corbie fur allowin this veesit
I hope I hinna kept ye frae yer busy schedule
Veesitors are like fish kept ower lang they stink