Ungiqome Wazi Kahle! Poem by Sizwe A Zungu

Ungiqome wazi kahle,
Ubuwaz' izinsongo zenhliziyo yami,
Bewaz' imidanti namathizethize,
Bewaz' izigemegeme zami zonke
Keph' ukheth' ukungithanda,
Yiz' inhliziyo beyithwel' amathantal' otwayi,
Yiz' inhliziyo beyiboph' izibopho zezindophi!
Ungiqome wazi kahle,
Bewazi ngiyibhimbi lokwenz' okuhle,
Izono zami zisithwe zintaba zobubi,
Awangabala wangigixabeza ngothando, ngancama
Wangifunz' intando yothando, ngasutha!