Yini Oyithandayo Ngami? Poem by Sizwe A Zungu

Ngitshele ngizwe,
Kade ngidwanguza
Emahlanzen' obumnyama
Nginyathel' izibi, ngibuye ngizendlale
Nawe ungangibuz' iziqhinqi namathandabuzo,
Ungang' ungananazi, ngitshele ngilalele.

Ngitshele ngizwe,
Ngizifanisa nekhasi lekhakhasi,
Elimuka nomoya okwesimukanandwendwe
Ngibuye ngikuxhake, naw' ungananazi
Ungixhakathis' okomunyov' okhalo,
Ungiqhumise ngohlek' ugaba, ugabise.

Yini oyithandayo ngami,
Ngamathizethiz' ogibe lwemibandela,
Ngamagaba enhliziyo, igaba ingqabavula
Iwuka okwesiwula, nalaph' ingcol' okwengulube.
Ungithanda ngisho nginezibazi zobuxoki,
Ungiphephise laph' ngisobozelwa yizitha
Kanti yini le enhle ngami?