Wedwa Poem by senzokhaya umhayi

Igama lakho wena unguWedwa,
Wena wedwa uyokuhlala ezweni lami,
Uzonethezeka nasenhliziyweni yami,
Nasemizweni yami uzoshwibeka njengomzwilili,
Eyokulilizela njengomililizel' enisela esivandeni sothando,
Oluyokhula njalo luye luthele amagatsh' ayokwakh' ubambo lwami,
Amazwi akho ayotweza njalo eyokeneneza emathanjeni,
Ngiyokunanela lonk' uhlamvu lwezwi oyokuliphimisa ngezindebe zakho,
Ezindlebeni zami liyofana nebika lezingoma zothando zabaculi base Melika,
Nami ngiyokuhayela ngikuculele umucu omnandi,
Ze nenhliziyo yakho inambithe lesi sidlo somphefumulo,
Ngizoguqa ngamadolo phambi kwakho ngikubambe isandla,
Ze ngikufumbuthise lesi lokozane somlilo esibilis' igazi lami,
Uze uvule amahl' ubheme ukholwe ilomlingo,
Phakathi kwabaningi abavule amehlo bathamela,
Nguwe Wedwa ophiwe isiphiwo sokuba uwubone,

Onobuhle baningi emhlabeni,
Njengezinkanyezi esibhakabhakeni,
Kepha wena phakathi kwabo ufana ngunyezi,
Bona ngibangathekisa nezinkanyezi,
Wena Wedwa upheth' inhlansi enomling' empilweni yami,
Lapho uthukuthele nami ngiyadikibala,
Lapho ugigitheka nakimi kuvela elomhlathi,
Wena ufana nomthombo onempophoma egeleza amanzi amtoti,
Lapho kuphuza mina ngedwa vo,
Ungumthunzi ohlezi uhelezi umoya opholile,
Onesicephu sokuhlalisa uphumuze mina ngedwa vo,
Ezweni elikude sengihambile ngilambile futhi ngomile,
Ngathol' umuthunzi wokugoba amadlangala,
Nokudla kokubamb' umoya,
Namanzi amtoti okuthambis' umphimbo,
Bengiyomtholaphi okwazi ukulapha ukukhathazek' okulapha ngaphakathi,
Ngoba akekho noyedwa onesiphiwo sakh' Wedwa,
Uphiwe kwaba esakho wedwa,

Uzalwe emhlabeni ufumbethisw' ithalente ngami,
Udalwe uMdali kwangathi wayekuhlebelile,
Ukuthi uyofika ezweni uyofica owesilisa okhathazekile,
Nabazali bakho ngathi babetsheliwe ngami,
Ngokuba bakulonda bakulolonga waze wafika kimi ukhazimula,
Ngakubona udlula wangikhanga njengesiqholo samakha esithakwe kamnandi,
Ngamehlo ngakuphekezela ngikulandela uyosithela,
Okwesibili lapho uvela ngazidela isibindi,
Ngibonga uMdali awuzibukanga ngami kepha wama,
Kanjalo saqala ukwazana nokuxhumana,
Kwaya yazikhulumel' imvelo yaxhuman' imizwa,
Omunye wathand' oyedwa kimi kwavela wena Wedwa,

Namhlanje ngingowesilisa ophelele emoyeni,
Bengifana nengidi ekhiyiwe kwaphathiswa wena ukhiye,
Sonke lesi khathi ngizamile ukucing' obezovula engene kweyam' inhliziyo,
Kepha bengihamba ngizigqubuz' ezindongeni,
Buka ngisenemihuzuko ezihlakaleni,
Kepha okuhle ukuthi ugcine ufikile wavula amakentango,
Uzohlalakahle unethezeke etilogweni lakho lothando,
Noma sekukhali icilongo nemilolozelo yokugoduka,
Ngiyokuvulela ukhululeke kodwa ngiyobe ngithokozile,
Ngokuba wena Wedwa ngiyobe ngikunikile okwakho wedwa.

Wedwa.

USenzokhaya Umhayi