ಪ್ರೀತಿ Poem by PRAVEEN KUMAR Kannada Poems

ಚಂದ್ರ ಸೂರ್ಯರಂತೆ ಸ್ತ್ರೀ ಪುರುಷ ಮಧ್ಯೆ ಪ್ರೀತಿ,
ಜೀವ ಜೀವನದ ದಿವ್ಯ ಬೆಳಕು ಚೇತನದ ಶಕ್ತಿ;
ಮುಖಾಮುಖಿಯಾಗಿ ಪ್ರೀತಿ ಪ್ರತಿಫಲಿಸಿದ ಸಮಯ,
ಅದುವೆ ಹುಣ್ಣಿಮೆ, ಪೂರ್ಣಚಂದ್ರ, ಬೆಳದಿಂಗಳು.

ಸ್ತ್ರೀ ಪ್ರೀತಿ ಮಧುಮಧುರ ಚಂದ್ರಮನ ಹಾಗೆ,
ಮಂದ ಬೆಳಕು, ಶುಭ್ರ, ಹಿತ, ಅನಂದಮಯತೆ;
ತಿಂಗಳಾವರ್ತದಲಿ ತುಂಬಿ ಮತ್ತೆ ಕಳೆಗುಂದಿ,
ನಿಧಾನ ನರ್ತನದಿ ಲೋಕ ಬೆಳಗುವ ಸೌಹಾರ್ದತೆ.

ಪುರುಷ ಪ್ರೀತಿಯೋ ಮಟಮಟ ಮಧ್ಯಾಹ್ನದ ಸೂರ್ಯ,
ನೇರ, ತೀವ್ರ, ಪ್ರಚಂಡ ಬಿಸಿಲಿನ ವಿಕೀರ್ಣತೆ;
ನೆತ್ತಿಗೇರಿದರೆ ಮಧ್ಯಾಹ್ನ, ಕೆಳಗಿಳಿದರೆ ನಟ್ಟನಡು ರಾತ್ರಿ,
ದಿನರಾತ್ರಿ ಅವರ್ತನೆ ಪುರುಷ ಪ್ರೀತಿಯ ನಿಬಂಧನೆ.

ಸ್ವಾರ್ಥದಂತರದಲ್ಲಿ ಪ್ರೀತಿ ಹೋರಾಡಿದಾಗ,
ಗೃಹಯುದ್ಧ, ಅಮಾವಾಸ್ಯೆ, ದಟ್ಟ ಕಡುಕತ್ತಲೆ;
ಹುಣ್ಣಿಮೆ ಅಮವಾಸ್ಯೆಯು ಜೀವನದ ನಿಯಮ,
ದಿನದಿನ ವೈವಿಧ್ಯ ತಂದಿಡುವ ದಿವ್ಯ ಮಂತ್ರವು.

ಪ್ರೀತಿ ಚಂದ್ರಸೂರ್ಯವಿದನು ಮೀರಿ ನಿಲ್ಲಬಲ್ಲುದು,
ಸ್ವಾರ್ಥದಂತರ ಮರೆತು, ಮುಖಾಮುಖಿಯಾಗಿ,
ಸದಾ ಹುಣ್ಣಿಮೆ, ಪೂರ್ಣಚಂದ್ರ ಪ್ರತಿಫಲನಗೊಂಡು,
ಶುಭ್ರ ಹಿತ ಆನಂದದ ಬೆಳಕಲ್ಲಿ ತೊಯ್ಯಬಲ್ಲುದು.