Anup-Op Nga Damgo Poem by Alice Cuenca

Balak, mihulma ug anino
gipas-an sa huyuhoy-
nagpahipi,
halos ko mahakop.

Ang akong kasingkasing miugnat
sama sa lawalawa'ng nagbanay-
mitulay,
ang gilay-on wa nay gahom.

Balak nga miukit ug larawan sa
pulong nga motukob,
milikos sa kangitngit.

katulog, wala bati-a
kay unsay pulos sa kahayag
kung ang panan-aw nababagan
sa handurawan?

dalikyat nga pamilok,
gabonong damgo, way bulok
naaninag ko ang tubig;
sihag, matin-aw, way anino.

Ako ang dahong milutaw sa lim-aw
sa nalubog nga panganod
tan-awa! naglupad ako
sa nagkatualing kalibutan