Emazweni Kangiyifumananga Poem by Khabzyvee Mkhize

Emazweni Kangifumananga


bathi induku enhle igawulwa ezizweni.
sengihambe kwaze kwatsheka iscathathulo ,
ngilibangise emazweni kepha lutho kangiyifumananga.
Sengiwagawule ngagawula amahlathi emazweni,
sengize ngaphenduka umagawula ekuhambeni,
kepha lutho ukuwa uzihlahla ukuze ngifumane
esesicongweni engathintwa mfana wazinkomo.
Ekuhlala kuyo ijuba kuphela
nalo uma lizikhokhala umoya,
ze'liqhubeke nobude bendlela yalo, belu
liphethe izintethe ngomlomo liyophakela
abantwana balo, kude le ezinkalweni.

Nami ngifuna yona leyonduku ephume yodwa
enhle ngaphakathi, kuyo engiyohumula kuyo.
Lapho ngibuya emphantweni wokuphantela
abancinyana bethu.
Ngiyasola kwangathi indaba yami ,
isokhambeni lwemikhuba yabakhunkulu.
Lona abaluzamazamisa imihla ngemihla kuze
benze amehlo ami afiphale, nembazoyami
ibebuthuntu ukuze bazohlekisa ngami.


Sengize ngisole nobuthuntu beyami imbazo
kepha ngiyayazi ibukhali nje pho yawisa obhongabhonga,
qede bangibhokele ngolaka bangabonga nakubonga.
Kunalokho bamila umsila, okwezingcanga
bawutshikizise bayoshona kwanhliziyo.


Kangiyifumananga induku ekungeyekhethelo.
Induku engingangena nayo kokababa umuzi qede
kuphakame isalukazi esiwumakazi sikikize, singinike igunya.
Ngisho lokuwisa imigoqo esibayeni sikababa.
Ze'ngingene ngishaye izimeshe.

Ngizikhombe inyathuko ebheke emazweni.
Kunalokho ngifumana izagile nezikwili
qede zingigile zingikhwife kuze ngilibale yikhaya.
Zigilana uphathwe uzagiga ungakwazi nakuziphendulela ,
zangigila qede zagiya ngami zangibiza ngenyoni
yakwamhlabuyalingana, Ntanga yethu.
Angithi eyomthetho ingalo imfushane kwabesilisa
pho siyakubalekel'aphi nalopho,
basiphendula olamthuthu basibilisela
amanzi ngomlomo okusichutha singezinkukhu.
Zingigile ngawa ngobuso kusale kubheke isiphundu
ngoba siphundu kawuboni ziyakuhleka izinyoni.


Zona zishaye zichithe , ezasemazweni
ubhekile nobhekeni usungasekho emcengezini.
Ngisale nginkemile sezikhale zamuka
ngasala ngikhala nenkemane,
isho ukukeqa amagula ngami .
Angithi nokuka Khesari ebengikuhlanisa
ngikuhlanganisela injabulo yethu yangomuso,
zikhale zamuka nakho.

Lapho ezimathonsi kangisazikhali ntangayethu.
Sengikhala ezigobhozayo ngicabanga
imicabango, ebengiyicabanga ngayo
ngithi langa limbe ngizokwehla nayo
sishone phansi emihosheni ngihamba
ngiyiviva phezulu emoyeni ngiphosa ngiyinqake
ngihlabelele ngekhwelo ngimatheke kuhle kuka
Senzangakhona ebona uNandi empophomeni.
sivumbuke nembali sidlale ngayo,
sinqakisana qede siyobuka imvelo.
Sibuke namanzi agobhozayo emigedeneni.
Kepha namhlanje sesiqakisana ngamagama ntanga.
Namhlanje ntanga lawomanzi asagobhoza kimi
ebusweni bami.sekuphenduke umgede
wamanzi kasawoti angeke aphuzwa ngumuntu.

Semgasala nakho ukuziduduza
Ngokuhlangani bona ongwaqa,
nonkamimisa, ngiziba ukukhamisa kokuzamula
kwazise nekati selisondelela khona ngaseziko.
Namafutha kabhekeni asashabalele awasekho embizeni
sekusele wona amakha kabhekeni.

Ngiyazame nakho ukuzilibalisa,
kephi inhliziyo ilokhu ikhalile ibalisa.
Kwazise phela engeqiwa ntwala
ekhanda ingozi iyankenketha.
Neminjunju enhlizweni ihlaba iphindelela.
Okwesibhobo esihlaba sisho ukukwendisela
kwelabangasekho, ngenxa yamazwi okubizwa ngesishimane
Noma ubhekeni ungasekho
ngisacela ukungena kulelihlasha
eliseceleni komuzi kababa elinganakekile
kungenza ngayishiye kulo eyami induku.
Isihlahla esiphethe eyami induku singale kamakhelwane.
Emazweni kangisifumananga.

imbongi yakokhabazela (Cebo Mkhize)