High Tension Poem by Suresh Kumar EK

അടുത്തടുത്തുള്ള
ഹൈടെൻഷൻ കമ്പികളിലിരുന്നു
രണ്ടിണപക്ഷികൾ
കൊക്കുരുമ്മാൻ നോക്കുകയാണ്
നഗരമധ്യേആരുംകാണാതെ
അവർ പ്രണയം അറിയിക്കയാണ്
ആ പഞ്ചവർണ്ണക്കിളികളുടെ
നൃത്തം ചെയ്യുന്ന ചിറകുകളിൽ
ശൃംഗാരം വിടർന്നു പുഷ്പിക്കുന്നു
നഗരമധ്യേ, രണ്ടുകമ്പികളിലിരുന്ന്
അവർ കണ്ണും കണ്ണും നോക്കുകയാണ്
ഒന്ന് കൊക്കുരുമ്മിയാൽ തീർന്നു
രണ്ടും കരിക്കട്ട
സ്വന്തം ശരീരത്തിലൊഴുകുന്ന
വൈദുതിയറിയാൻ
പ്രണയികൾക്കൊരിക്കലും
കഴിയാറില്ല.
ഒന്ന് ചുംബിക്കാൻ വേണ്ടി
കരിഞ്ഞുചാരമായാലെന്ത്
ആഒരു നിമിഷം മാത്രം
മതി.