Hlangana Zulu Poem by Cebolenkosi P. Mkhize

Hlangana Zulu
Sekuke kwanhlanga zimuka nomoya,
Konke okwenzeka kulomhlaba sikushay'indiva.
Ixhwa lihlaba liphindelela kwemyama sithule.
Sibheke abaphathi bezwe angithi sesaphila
Ngaphansi kwesandla sensimbi yona eqinela uZulu.
Mesike saphawula bayosibophela amanqina enyathi
Azosibhekisa kwagoqa nyawo.

Yawukhahlela umuthi inkonyane madoda
Bachitheka bugayiwe dade wethu kababa
Yaze yahlangane emnyama qhudemanikiniki
Nawe mnike isongo lakhe. Sekuyosinda
Oyozishutheka ezidwabeni zikanina,
Isingene ekaNdaba cashisani izinkubela.

Ningabe nisabamba ongezansi nizimangalisa
Lena kayisamangalisi, omangele
Seyolithetha yedwa, kwazise -
Nengalo yomthetho, isize yanqamuka
Kudala iyinde ngakithi ubude bayo buyize.

Amagejake aselingane abalimi
Kazivele zilime ziliqonde itshe, nokujikela
emuva angeke kusasiza ngalutho.
Isiphakiwe Zulu Itshe selimi ngothi.
Isala kutshelwa sesiyobona ngomopho.
Impela ke! nanka akake umbombo sesiyobona ngawo.

Hlangana ke! Zulu omnyama uzithathe, ushone khona.
Useyiphakile uPhakela ke, Ngizwe Zulu.
Umthakathi okhunkula elikandaba uphakathi endlini
Uyayiphehla imbokodo, nikhumbule akaqali namuhla.
Waqala ngokusimbela amaliba sisadla anhlamvana.
Walivala thaqa! elikandaba esivalela namaveza ndlebe.
Wabhubha omunt'ompisholo silitshelwe amashica.

Namuhla sebakhomba ngophakathi kwelikaNdaba
Sebeze bazivusela obabo ubukhosi sibhekile.
Hlangana Zulu nanti ilanga nelanga kusihleka usulu.
Nanka namagwababa esechobana ake ngiwaxoxele.
Lezike sekuzimpendulo zem'ndeni yethu eyafa yambelwa.
Singayibonanga, yalahlwa ezintabeni okwezingcanga.
Ngesandla somuntu thizeni owaqotha imbokodwe nesisekelo
Ngenhloso yokuthengisa ngobuzwe bethu.

Kanti yena lezintambo aziphethe kazijubeki yini na?
Kuphume ivezandlebe kungene uZulu nebheshu.
Ikhululeke emnyama emakentangweni ,
Amaketango entando yeningi evuna ontaba kayikhonjwa
Thina ibe isikhipha inyumbazana okomfelokazi.
Noma ke singabafelokazi akusenani.
Elobaba sizolilelwa kumnyama kubomvu

Sekwanele manje, hlangana Zulu sishone khona.
Okhokho bethu abalalayo bayalila emalibeni,
Mebabone izwe abalilwela kanzima lishabalala sibhekile.
Lentando yeningi engathi impicabadala, kazibuye emasisweni.
Lomkhunkulu akavele aphakelwe ushevu qede Izintambo
Zibuyele kuZulu ngoba lentando yeningi ivuna abazizwe.

Kwelethu elinonileyo kasivuni lutho.
Kunalokho bavuna bakhiphele ngaphandle
Bese basitshela ngohwebo babe beba amasela lawa.
Hhayi ngoba ngiphehla udweshu kepha uzwathi
Ngizakuliphehla kuze lomlilo uzovutha ukhanyisele uZulu

Namathongo asikhumbule asikhanyise ngoba kumnyama Zulu.
Nalamajazi amnyama eziqu alenga ezindlini, kwawona
abanga ububha, aze asivale amaqaphelo okuba siqaphe
Umhlaba wokhokho ezihambini
Umhlaba ononileyo none mfudumalo.
Awasisizingalutho kunalokho asilahlisa imvelaphi yethu
Size silibale nokuthi singobani bakwabani sivelaphi.

Ngiyazike kukhona abazokushaya indiva lokho
Ngoba sebafunjathisiwe okukakhesali
Ningakulibali ukuthi imvelo iyakhuluma
Inkankane nenkankane kalidle umsundu wangakubo
Umthalo mawube sobhokweni, nina seniphenduke izinkunzi,
Kwesethu isibaya, ezimbili ke kazihlalelani esibayeni sinye
Akuphume umnyuzi kusale inkunzi mekungenjalo
Sesiyobona eyogoba uphondo.

Ungwengwezi emaqaphelweni selwengulekile.
Inkungu ibisisithile sishabalele namaqaphelo
aseyabona buqamama cishe saphaphama,
umencelo sujutshiwe sisazumekile.
Namagugu ebebiza thina eseshalalele.

Nakithi selikhalile ke! Sekusile, siyabonga.
Ngizwe uZulu ukuzwile uPhakele uZulu
Qede wavuleke amaqaphelo okuqaphela okwenziwa
Umthakathi oloye uzulu wavaleka amahlo
Sibonge ukuba *uPhakele'Thakathi* kuze simbone
Yena lona owakhunkula indlu emyama yaze
Yavaleka amaqhaphelo okuqaphela impi.

Ibhalwe Cebolenkosi Mkhize (Imbongi yakoKhabazela)