Lamha-E-Fikriya Poem by Akhtar Jawad

Apna keya hay jaise jiye jate hayn unhi mar bhi lenge,
Thora bahut jo baqi bacha hay kar paye to kar bhi lenge.
Dahshat ke mahol mein bache padh bhi saken ge rah bhi saken ge,
Inko bahut kutch karna hay keya yeh bechare kar bhi saken ge.
Yeh keya hay yeh keyun hota hay kahin na kahin to hum bhi ghalat hayn,
Kis mushkil se hum simte they keya asani se bikhar bhi saken ge.
Yeh aag ka darya behta hua kiss sagar mein jakar utre ga,
Keya jalte hue jee paen ge keya hum sagar mein utar bhi saken ge.
Keyun barf pighal kar aag bani koi soche to samjhae to,
Sholon mein jo phool khile keya rang-o-boo mein nikhar bhi saken ge.
Keya hum aag mein jal kar rakh banen ge aur bikhren ge hawaon mein,
Main sochta hoon hum jaise kabhi keya qabr mein apni utar bhi saken ge.
Hum johl ke toofan mein hayn ghire badsoorat hum sa koi nahin,
Aaina dekh ke soche koi keya mustaqbil mein sanwar bhi saken ge.
Aiy mere khuda aiy mere khuda aiy kash tuhi batlae mujhe,
Makrooh yeh chehra lekar keya hum samna tera kar bhi saken ge.
Us sal ko choro chala jo geya wuh sahme sahme guzara hay,
Ye sal naya jo aya hay is sal mein keya hum dar bhi saken ge.
Wuh sal abhi kal jo guzra kutch leke geya kutch deke geya,
Yeh roshni aaj jo ubhri hay keya isse daman bhar bhi saken ge.