बड'फा Poem by Lazathao Basumatary

आगोमा बर'नि फिसा
आफा उपेन्द्र नाथ ब्रह्म,
नों सिमां नुनाय बड'लेण्डखौ
जों बावलाङाखै आफा।

जोंनि हांमा-हांसाखौ राहा होनो
आवगायदोंमोन दैदेनगिरि जानानै नोंदि
बर' हारिखौ गेरेमसा खालामनो
बुहुम बिखायाव।

नोंनि गोदै सिमाङा
फोजाखांनानै दं दाबोनो
जोहोलावनि फिसा बर'फोरखौ।
लाहोदों दाबोनो जोंखौ
नोंनि सिमांखौ जाफुंसारहोनो।

बारहुंखा सोगोमनायावबो
नोंनि रैसुमै खुगानि बड'लेण्डनि हख्रावनाया
आथुर खालामहोयो जोंखौ;
मेंनाय-बानायनि मिजिंखौबो सिफायहोयो।

जों नाजागासिनो आफा
नोंनि नुनाय सिमांखौ नोंनोनो बावनो
जोंनि मावनाय खामानियाव
नोंखौ बिफा होन्ना समायखिरा लानानै।

नोंनि सुबुरुना गोहो होयो जोंनो
जोंबो दावगायो नोंनिनो बायदियै
गोख्रों आगोमा जोहोलावजों।

नों रुँसारि जादोंब्लाबो
थुलुंगा गिरि जानानै
जोंनो गोहो होबाय था आफा
जोंनि जांख्रिखांनाया जाफुंनो हाथों,
बर' माहारिनि अनागारिनि हेंथायै
जों हाथों गेरेमसा जानो
फैलाव बुहुमाव-
जै आफा बड'फानि॥
जै बड'लेण्डनि॥