देंखो आरो आंनि महर Poem by Lazathao Basumatary

गोबां देंखो खोनासंनानै माखासे खोथा गोसोखांदों आं
बै रोजाबगिरिफोरा बबे मोनसे थासारियाव थायो..
बिथांमोनहा दोंफ्रोमबो देंखोनि खबामजों
गावसोरनि जिउ जारिमिनखौ फोरमायो
ना...............
जेरै गोसो एरै
(जिउजों जेबो सोमोन्दो थाया)

आंहा दोंसे देंखोनि खारथायाव दुखुब्ला दुखु जाफायो
रंजानायब्ला रंजानो गोसो जायो
आर'ज मेथाइब्ला आर'ज मेथाइबो गोसोखाङो
आरो गुबुन समाव गुबुन गुबुन

बैसागुब्ला गासैबो देंखोगिरिफोरा
बैसागु देंखो रोजाबना गोबां खोनासंगिरिफोरनो खोनासंहोयो
देंखोगिरिफोरा गावसोर जेरै गोसोनि खोथाजों देंखो बोदों
बेजोंनो खोनासंगिरिफोराबो रंजाफादों
आर'ज मेथाय रोजाबब्ला
बेयोथ' आलादा
आनान गसायखौ खुलुमनो थाखाय लिरनाय देंखो
बे समाव बयबो एखे महरावनो थायो

सावथुनाव फाव खालामनायाव
सोरनिबा सोरनिबा आखुफोरा थैनायनि
नाथाय बिसोर गुबैयै थैया

माब्लाबा सासे देंखोगिरिया जौसाङाव गाखोनानै
दोंसे रंजानायनि, दोंसे दुखुनि, दोंसे मानिबा
मोनसे समावनो रोजाबो
बेफोरखौ नायोब्ला
देंखोफोरा ओंथि दंब्लाबो
बुजिनो हाया जायो
थेवबो खोनासंग्राफोरा
मा समाव मा रोजाबो बेजोंनो थांफाना गोसो होफायो

नाथाय गोबाङा मा सानो
आं जेब्ला देंखो खोनासङो
फारि फारि जा देंखोआ थाङो
आंहा गासैबो देंखोफोरनि सेर सेरसो थांबाय थायो