കൂട് (Malayalam) Poem by Farisa Haleel

നിർബാധം താഴേക്ക് പതിക്കുന്ന
ഓലകളുടെയും തേങ്ങകളുടെയും
കൂട്ടത്തിലേക്കു കൂട്
എടുത്തെറിയപ്പെട്ടത് കണ്ടപ്പോൾ
കണ്ണുകളിൽ ചൂട് കയറി,
വെള്ളം നിറഞ്ഞൊഴുകി...
ഉയരത്തിലേക്ക് തല നീട്ടിയ,
കാറ്റിനെയും കൂട്ടിനെയും
താലോലിച്ച,
തണലിന്റെ തൂണ്
വെറുമൊരു വരയായി
പതിയെ നിലം പതിച്ചു...
കൂടൊരുക്കിയ കമ്പുകൾ
നെരിഞ്ഞമർന്നു.
നിലവിളിക്കാൻ തൊണ്ടയിടറി...
ചിറകുകൾക്ക് ഭാരമേറി...
നിറഞ്ഞ കണ്ണുകളിൽ
ഒറ്റവരക്ക് പകരം ഇലക്‌ട്രിക്
വരകൾ തെളിഞ്ഞു...

[22 September 2016]