Mapait Na Oyayi Poem by Jose 'Pepe' Carrascal

Pagabi na naman,
maghapon na akong nakadungaw sa bintana,
bagot na nagmasid
at taimtim na nag-abang
sa pagtila ng animo'y walang patdang pag-ulan.

Mapipilitan akong mahiga
nang may kirot na kinikimkim
dahil bawat patak ng ulan sa bubong
lumalagos na parang karayom
sa aking nalulunod na kaibuturan.

Paulit-ulit na nagpapaalala
na ako ay luhaan.
Dahil ako ay bigo-
matutulog, ngunit gising, nang hindi nasisilayan
ang liwanag ng buwan.