Roz Dekha Hai Shafaq Se Poem by Farzana akhtar

Roz dekha hai shafaq se wo pighalta sona
Roz socha hai ke tum merey ho merey ho naa

Meiney Kanon mein pehan lee hai tumharee aawaz
Ab merey waastey bekaar hain chaandi sona

Meri khamoshi ko chupke se saja do aa ker
Ik ghazal tum bhi mere naam kabhi likho naa

Rooh mein geet utter jatey hain jaise khushbo
Gun-gunatee si koi shaam mujhey bhejo naa

Phir se aankhon mein koi rang saja ley naina
Kab se khwabon ko yahan bhool gaee thi bona