Sara Teasdale 05 - പ്രാർത്ഥന Poem by Unnikrishnan Sivasankara Menon

(Malayalam Translation of Poem 'A Prayer' by Sara Teasdale)

ഞാൻ മരിക്കുമ്പോൾ, അറിയിക്കേണമെന്നെ
ചാട്ടവാറുപോൽ ദംശിക്കുമെങ്കിലു-
മെനിക്കിഷ്ടമായിരുന്നു വീശി-
യടിക്കും മഞ്ഞിനെയെന്നതും;

മോഹനവസ്തുക്കളെയെല്ലാം ഞാൻ
പ്രണയിച്ചിരുന്നുവെന്നതും, അവതൻ ദംശനങ്ങൾ
സാഹ്ലാദമതിക്തമാമധരങ്ങളാൽ
സ്വീകരിക്കാൻ ഞാൻ ശ്രമിച്ചിരുന്നുവെന്നതും;

എന്റെയെല്ലാ ശക്തിയോടെയും,
ജീവന്റെ മുഴുവൻ ആഴത്തിലുമകലത്തിലും,
എൻഹൃദയമുടയുന്നെങ്കിലങ്ങിനെയാകട്ടെ,
ഞാൻ സ്നേഹിച്ചിരുന്നുവെന്നതും;

ഓരോന്നിനുമേറ്റവും ചേർന്ന ഈണങ്ങളിട്ടു ഞാൻ
കുഞ്ഞുങ്ങൾ പാടുംപോൽ പാടിയിരുന്നുവെന്നതും
ജീവിതത്തെ ഞാൻ പ്രണയിച്ചിരുന്നത്
ജീവിതത്തിന്നുവേണ്ടി മാത്രമായിരുന്നുവെന്നതും.