Sara Teasdale 122 - ഒരു ഗാനം Poem by Unnikrishnan Sivasankara Menon

ഏതോ പുരാതന പ്രണയകഥയിലെ
കുന്തമുനയുടെയും കപ്പൽച്ചുക്കാന്റെയും തിളക്കമിഷ്ടപ്പെടുന്ന
അപൂർവ്വയായ രാജ്ഞിയെപ്പോലെയാണവൾ.
ആർതർ രാജാവിന്റെ കാലത്തെ ഒരു തന്ത്രിവാദ്യവാദകൻ
അവളെ പ്രശംസിക്കാൻ ഒരു നൂറ് വിശേഷണങ്ങൾ പ്രയോഗിച്ചിരിക്കാം
സ്നേഹവിനയങ്ങളുടെ ചക്രവർത്തിനി -
ഓ, ദൈവം നിന്നെ അനുഗ്രഹിക്കട്ടെ, എന്റെ ഹൃദയമേ,
മമ ജീവിതമേ.

അവളുടെ തലമുടി കിരീടം പോലെ മെടഞ്ഞിരുന്നു
സ്വർണ്ണത്തിൽ മെടഞ്ഞ കിരീടം അതിനേക്കാൾ ഭംഗിയുള്ളതാവില്ല.
രാജ്ഞിയുടെ അന്തസ്സിനൊത്തതായിരുന്നു, പുരുഷന്മാർക്ക് മനസ്സിലാക്കാവുന്നതിലും സുന്ദരമായ ആ വദനത്തിൽ
എപ്പോഴും പ്രകാശിക്കാൻ തയ്യാറായിരുന്ന അവളുടെ പുഞ്ചിരി.
ഓ, ദൈവം നിന്നെ അനുഗ്രഹിക്കട്ടെ, എൻ ഹൃദയമേ,
മമ ജീവിതമേ.

അവൾ അതീവ ദയാലുവൊന്നുമല്ല, എനിക്കറിയാം;
പണ്ടുകാലത്ത് രാജ്ഞിമാർ മഹാമനസ്കരായിരുന്നു,
കഷ്ടം!
വിനെഫിയാരാജ്ഞി ലാൻസെലോട്ടിന് പലപ്പോഴും
മധുചുംബനങ്ങളേകുമായിരുന്നത്രെ; എനിക്കും ആഗ്രഹം...
അദ്ദേഹത്തെപ്പോലെ പ്രണയിക്കപ്പെട്ടിരുന്നെങ്കിലെന്ന്
കൊതിക്കുന്നുണ്ട് ഞാൻ.
ഓ! ദൈവം നിന്നെ അനുഗ്രഹിക്കട്ടെ, മമ ഹൃദയമേ, മമ ജീവിതമേ.


This poem is Malayalam Translation of the poem Song II by Sara Teasdale.