Sara Teasdale 123 - ചുവന്ന മേപ്പിൾ Poem by Unnikrishnan Sivasankara Menon

ചുവന്ന മേപ്പിൾ മരങ്ങൾ

എത്ര പുരുഷന്മാരാണ് എന്റെ വിശ്വാസത്തിന്
അർഹതയുള്ളവർ എന്ന് ഞാൻ കഴിഞ്ഞ വർഷം പഠിച്ചു;
ഞാൻ സ്നേഹിച്ചിരുന്ന എന്റെ സുഹൃത്ത്
മൃത്യുവിന്നടിയേറ്റ് പൊടിയാകുന്നത് കാണേണ്ടിവന്നു,
ഇതുവരെ എനിക്കജ്ഞാതമായിരുന്ന ഭീതികൾ
എന്റെ വാതിലിൽ മുട്ടുകയായി, വീണ്ടും വീണ്ടും മുട്ടുന്നു-
'ഞാൻ ഏറ്റവും കുറച്ച്മാത്രം പ്രതീക്ഷിക്കും, ആവശ്യപ്പെടുന്നത്
അതിനേക്കാൾ കുറവുമായിരിക്കും', ഞാൻ പറഞ്ഞു,
'സന്തോഷം തീർത്തും ഇല്ലാതായിരിക്കുന്നു.'

അവസാനം എനിക്ക് ബുദ്ധിയുദിച്ചിരിക്കുന്നു, എന്നാൽ എങ്ങിനെ
വില്ലോമരച്ചില്ലയിലെ തിളക്കം എനിക്ക് ഒളിപ്പിക്കാനാകും?
അല്ലെങ്കിൽ ഏപ്രിൽ തിരിച്ചെത്തിയ ഈ സമയത്ത്
എങ്ങിനെ ഞാൻ മഴയിൽനിന്ന് സുമസുഗന്ധം മാറ്റിനിർത്തും?
പുകമറയ്ക്കുള്ളിലെ തീപോലെ മേപ്പിൾമരങ്ങൾ നില്ക്കുമ്പോൾ
എന്റെ പഴയ ആഗ്രഹത്തിനോട് ഞാനെന്തുപറയാനാണ്?
കഠിനവേദനയിൽ നിന്നുരുവമെടുത്ത
എന്നുള്ളിലെ ഹർഷത്തെ ഞാനെന്തു ചെയ്യും?


This poem is Malayalam Translation of the poem 'Red Maples' by Sara Teasdale