Sara Teasdale 45 - സഹതാപം Poem by Unnikrishnan Sivasankara Menon

സഹതാപം

This is a Malayalam translation of the poem " Pity" by Sara Teasdale.

എന്റെ കാമുകന്റെ മുഖം അവ-
രൊരിക്കലും കണ്ടിട്ടില്ല,
ഞങ്ങളുടെ പ്രണയം ഹ്രസ്വമായിരുന്നു
എന്നുമാത്രമാണവർക്കറിയാവുന്നത്,
കുറച്ചുനാൾ അതൊരിളംകാറ്റിൻ
ചാരുതയണിഞ്ഞിരുന്നതായും
പിന്നീട് ശരത്കാലത്തിൽ പൊഴിയു-
മിലപോൽ കടന്നുപോയതായും.

ഞാൻ കരയാത്തതെന്തെന്ന്
അവർ അതിശയിക്കുകയാണ്,
എനിക്കിപ്പോഴും പാടാനാവുന്നത്
അവർക്കസാധാരണമായിത്തോന്നുന്നു,
അവർ പറയുന്നു, 'അവളുടെ പ്രണയം
തീരെ ആഴമില്ലാത്തതായിരുന്നു, നോക്കൂ,
പ്രണയഭംഗത്തിന്റെ ദംശനം എത്ര നിസ്സാര-
മുറിവാണുണ്ടാക്കിയിരിക്കുന്നതെന്ന്! "

അവരെന്റെ പ്രണയം കണ്ടതേയില്ല,
അവർ അറിയുന്നതുമില്ല, എന്റെ ഹൃദയത്തിന്റെ
ഏറ്റവും രഹസ്യമയമായ ഉള്ളറകളിൽ
ഈശ്വരനെ ഒരിക്കലും കണ്ടിട്ടേയില്ലാത്ത
മനുഷ്യരോട് ദൈവദൂതന്മാരെന്ന പോലെ,
ഞാനുമവരോട് സഹതപിക്കയാണെന്ന്.