Telugu Poem తప్పుగా అనుకోవద్దు Poem by Srininivas Reddy Paaruvella

కళ్ళు మూసుకోలేదు
చెవులు దాచుకోలేదు

ఎందుకో మరి
నువ్వు కనబడలేదు
అసలు వినబడలేదు

అప్పుడెప్పుడో
సాగర తీరంలో ఏరుకున్న గవ్వలు
వాగు ఇసుకలో దొరికిన గులకరాళ్లు
జ్ఞాపకాల పండగ చేస్తున్నపుడో

ఇంకెప్పుడో....
అక్షరాల భావ చిత్రాలను చూస్తూనో
మనసు చెప్పే మూగ భాషను వింటూనో

బహుశా నిన్ను గమనించనే లేదు

చీకటి కానే కాదు
ఉరుములు లేనే లేవు
ఎందుకో మరి
నువ్వు కనబడలేదు
అసలు వినబడలేదు

కళ్ళను ఆకాశంలో విసిరేసి
అనంత విశ్వం చూస్తున్నప్పుడో

చెవులను సంద్రంలో పడేసి
కడలి దుఃఖం వింటున్నప్పుడో

బహుశా నిన్ను గమనించనే లేదు

నేస్తం నిజమే చెప్తున్నా
నమ్మక తప్పదు మరి! ! ! ! ?

*పారువెల్ల*
22-06-2017