Telugu Poem చివరి మాట Poem by Srininivas Reddy Paaruvella

చివరి మాట

నువ్వు పున్నమిని పిలువు
కలువల్ని నిద్రలేపి వస్తాను నేను
హృదయానికి నాలుక ముడేసి
ఇంకొంచెం సేపు మాట్లాడుకుందాం మనం

ఎన్ని ఏళ్ళు వెంటపడ్డావో
ఇంకెన్నిసార్లు నన్ను వెంబడించావో
సఖీ!
ఏ మొహమాటాలూ వద్దు
ఏ క్షమాపణలూ ఇప్పుడొద్దు.
మనస్ఫూర్తిగా నీలో నేనొదిగిపోతాను.

నేను పుట్టినప్పుడే
నువ్వు నాకోసం రాసుకున్న ప్రేమ లేఖ
ఈరోజు ఎలాగైనా ఇస్తావని తెలుసు నాకు.
మెరుస్తున్న చుక్కలు
మౌనంగా వున్న వెన్నెల
కదులుతున్న మేఘాలు
ఊగుతున్న ఆకులు
నీతో మొదటిసారిగా గడుపుతున్న క్షణాలు
ఇవన్నీ నాకిప్పుడు చివరి జ్ఞాపకాలు.
ఇక ఎప్పటికీ నన్నునీసొంతం చేసుకో

పారువెల్ల
12-11-2017