खखा बोराय Poem by Ronjoy Brahma

एबार बिहा बोलो गैलिया
रिमोनद्ला नंलिया बिनि उदैया,
नास्राय निस्ला, गोरै
ना खान्दा, सिंगि
माबा बाबि गोबां ना,
हाबलाय ओँखारलाय बिसोर-
स्लद दुद्रुदोँ बिसोर
बिदिनो मिनि-खुसि गाखोफिन्दोँ,
एबार एम्बु मासे हाब्बाय
बाला जाग्रा ना
ना खान्दा मावा बालाबोथिया
गासैबो एम्बुनि आदार,
खखा बोरायनि उदैयाव
एम्बुआ गेन्द्रा द्रा उदै।
दानिया ना थेँगोना
ना थुरि, खांखिला
गावजोँगाव उदै थुफ्रुलायबाय
गासैबो एम्बुनि आदार।
एबार साम'लादाय
मासे गांजेमा हाब्बाय
उदै गिदिर एम्बुआ हां हगारो,
रोजा रोजा नानि गोथै सोलेर
एम्बु ससमा खानस्रिनि गोथै सोलेर
खखा बोरायनि उदैयाव,
साम' लादाया थैयाखै
नुस'यै खनायाव एब्रेना थादोँ,
दा गांजेमाया राजा।
एबार खांख्राय मासे हाब्बाय
जागायबाय बिसोरनि दावहा
खांख्राय गांजेमानि
हर सान जेना जेना बिसोरनि दावहा,
महाभारतनि दावहाया जादोँमोन कुरुकेत्रआव
खौरब फाण्डबनि गेजेराव,
बयबो मिथिगौ ना मिथिया
आं मिथिया, नाथाय-
आं मिथिगौ,
दिनै दावहा खांख्राय गांजेमानि
खखा बोरायनि उदैयाव,
सान हर जेथोनिफ्रा बादोरसिम।