बिखाजों बारलांदों अर Poem by Ronjoy Brahma

सालाइ फिलन फिलन फरायनो हायै खोमसियाव
आंनि बिखाजों बारलांदों अर,
लेलाय लेलाय बाब्राब नांदों
मुगासे सिमांबादि सानसुथिर समाव।

आंखालनि हासाराव देरनाय गथ' आं
थालिर गायजायै गामलासे दैयाव गबनाय,
आरो आं सिमां सुजुनांदों संग्राय गिजियाव
मायगाब जुजाय बेखायनो जावगार जादों।

रोहो रोहो अर आंनि उदैयाव
दाबोरसे मिनिनायनि जेथोआव,
थैबाय थैथारबाय आं बाब्राब बाब्राब
सोनाबनि इन्जुर सौसिबोनाय गरसे गुलिजों।

दं आरोबाव आं हान्थिनाय लामाजों
गोसोम बिलो प्रसान्त लैथोमा,
आरो खोनायो रकेट एटमनि दुगानाय
बेमा माख्रानि खबाम होथेनाय।

साना सोनाबहा हाबलांबोला
खोमसि जाबोसिगोन नंगौ,
सयथिबो गिबाय आंलाय आथिं फोलावनो
बनजार सुखांनो ना सांग्रेमा हमनो?

रोहो रोहो अर आंनि उदैयाव
गोसो जायो बेखायनो सानजा फारसे,
उन्दै समनिबादि सुमफ्राम फिथाइ खावनो
रंजानायजों आलो आलो हैयानावा गेलेनो।